Nëse keni dëgjuar për divorcet më të bujshme këto 30 vitet e fundit, me siguri që keni dëgjuar edhe për emrin e Laura Wasser.
Avokatja e njohur e divorceve me karrierë të gjatë profesionale në këtë fushë, liston emra të tillë VIP në çështjet e saj ligjore, si Kim Kardashian, Britney Spears apo Ariana Grande.
Duket se divorcet e të famshmëve nuk janë aq të ndryshme nga ndarjet civile, përveç milionave që “luhen” në mes.
“Unë them se divorci është momenti që barazon të gjithë çiftet,” thotë Wasser. “Njerëzit përjetojnë të njëjtën frikë dhe dhimbje zemre, pavarësisht nëse janë të famshëm apo jo”.
Përveç fakteve, motivet që çojnë drejt ndarjes shumë çifte janë të njëjta për të gjithë. “Arsyeja pse njerëzit divorcohen është se ata nuk komunikojnë,” thotë avokatja e njohur.
Një lidhje jashtëmartesore, probleme me alkoolin, paaftësia për të komunikuar e të “gjetur gjuhën” në mesin e problemeve janë disa shkaqet që çojnë partnerët në dyert e gjykatave.
Këshilla e avokates është që t’i jepni përparësi bisedave të rëndësishme para se të thoni “Po” në altar. Diskutime të tilla se, a duhen dërguar fëmijët në shkolla shtetërore apo private? A duhet të jetojnë prindërit me ju apo në moshën e pleqërisë?
Por edhe shumë tematika tjera duhet të ceken para martesës që t’i kurseni vetes ca para e dhimbje zemre gjatë rrugëtimit. Nevojat e partnerëve ndryshojnë gjatë rrjedhës së martesës, në këtë rast komunikimi i mirë është çelësi.
Duke bërë biseda të vështira para ose në fillim të martesës, mund të kultivoni zakone të shëndetshme komunikimi që ju shërbejnë më mirë juve dhe partnerit tuaj. /nzoom.biz/