Në këtë periudhë të vitit, shumë prindër ndodhen në plazh me fëmijët dhe shpesh përballen me pyetje të sinqerta, por të sikletshme, që lidhen me trupin e njeriut.
Pyetje të tilla mund të na zënë në befasi, jo sepse janë të gabuara, por duam të përgjigjemi në një mënyrë që nuk ushqen stereotipe, por vendos kufij të qartë për respektin ndaj vetes dhe të tjerët, shkruan nzoom.biz.
Një nga pyetjet më të zakonshme që mund të dëgjojmë nga një fëmijë është:
“Pse mami e mbulon gjoksin me rroba banje, ndërsa babi dhe djemtë jo?”
Sipas Elina Mavropoulou, edukatore kopshti dhe themeluese e platformës “The Kids Society”, mënyra më e mirë për t’iu përgjigjur është me ndershmëri dhe gjuhë të thjeshtë, pa hyrë në diskutime të gjera apo në bindje personale që mund ta ngatërrojnë fëmijën.
“NUK ËSHTË MOMENTI PËR TË ANALIZUAR PSE GRATË E MBULOJNË GJOKSIN DHE BURRAT JO, APO NËSE DUHET APO JO TA BËJNË KËTË,” – THOTË MAVROPOULOU. “QËLLIMI ËSHTË T’I PËRGJIGJEMI PYETJES SË FËMIJËS ASHTU SIÇ E BËN: PA KEQDASHJE, THJESHT, SIKUR TË PYESTE ‘ÇFARË DO TË HAMË SOT?”
Si mund të përgjigjemi?
“DISA NËNA E VAJZA E MBULOJNË GJOKSIN SE PËR TA ËSHTË PJESË PRIVATE. KA EDHE GRA QË NUK E MBULOJNË, KJO ËSHTË NË RREGULL. SECILI VENDOS PËR TRUPIN E VET.”
Kjo përgjigje përçon mesazh të qartë: trupi është diçka personale, nuk ka një të drejtë absolute, dhe pranohen dallimet. Në këtë mënyrë, u mësojmë fëmijëve pranimin e ndryshimit, respektin për trupin e tyre dhe të tjerëve, të drejtën e zgjedhjes individuale.
Nëse fëmija pyet, mund të zgjerojmë bisedën sipas moshës dhe nivelit të kuptimit të tij. Por është e rëndësishme të mbajmë parasysh një rregull të artë:
Mos jepni më shumë informacion sesa pyet fëmija. Lëreni që ai ose ajo të drejtojë ritmin dhe thellësinë e bisedës. Ky është një moment i mirë për të folur me fëmijët për pjesët intime, privatësinë, dhe kufijtë fizikë dhe emocionalë, që janë thelbësorë për zhvillimin e një ndjenje të shëndetshme rreth trupit dhe marrëdhënieve me të tjerët.
