Të gjithë e kemi përjetuar këtë situatë: të shohim partnerin tonë të “mbytet” nga puna dhe të mos dimë si ta ndihmojmë.
Ose ndoshta jemi ata që ndjehemi të mbingarkuar dhe e kuptojmë se ndikon në marrëdhënien tonë, ndihemi të pafuqishëm për ta ndryshuar situatën, shkruan nzoom.biz.
“Lodhja e tepërt nuk është vetëm një barrë personale, ajo është edhe një provë për vetë marrëdhënien. Nëse nuk trajtohet në kohë, distanca emocionale mund të shndërrohet në një boshllëk të pakthyeshëm,” shkruan gazetarja Nell Frizzell në The Guardian.
Shumë punonjës përballen me presion të madh dhe kërkesa të paarsyeshme në vendin e punës. Në disa raste, është e natyrshme që puna të ketë prioritet, si kur përgatitemi për një projekt të rëndësishëm apo një certifikim profesional.
Por, nëse kjo bëhet zakon, marrëdhënia mund të dobësohet. Kur puna pushton çdo moment të përditshëm e partneri largohet nga jeta e përbashkët, kjo është një shenjë se duhet të ulemi dhe të flasim hapur dhe sinqerisht për marrëdhënien.
Çfarë do të thotë mbështetje e vërtetë?
Mënyra më e fuqishme për të mbështetur partnerin është të dëgjojmë me vëmendje, pa gjykuar dhe pa u ngut për të dhënë zgjidhje. Nuk është e nevojshme të bëjmë diçka konkrete; shpesh mjafton mirëkuptimi, një përqafim apo bisedë e ngrohtë dhe e qetë.
Tregimi i interesit të sinqertë për punën e partnerit, edhe nëse nuk e kuptojmë plotësisht, është një formë dashurie.
Një pyetje e vogël si: “Si shkoi ai takim i vështirë?” mund të ketë një rëndësi shumë më të madhe sesa mendojmë.
Kushtoni kohë vetëm për ju të dy
Rutina dhe angazhimet e përditshme shpesh e zbehin pasionin. Planifikoni takime të vogla ose pushime të shkurtër vetëm për çiftin – një darkë, një shëtitje, ose një film që të dy doni. Këto momente rikthejnë intimitetin dhe afërsinë.
Eksperimentoni dhe surprizoni njëri-tjetrin
Për të ringjallur pasionin, provoni diçka të re, një aktivitet, hobi ose aventurë e vogël. Një mesazh dashurie, një lule pa arsye, apo një darkë e gatshme – bëjnë mrekulli.
Përkujdesuni për afërsinë fizike
Kontaktet e vogla fizike, përqafimet, puthjet dhe dorë për dore, janë thelbësore për të rikthyer intimitetin. Jo gjithmonë duhet të lidhen me seks; afërsia fizike rrit ndjenjën e sigurisë dhe lidhjes emocionale.
Si të qëndrojmë pranë partnerit?
“A do që të të dëgjoj apo të ndihmoj me diçka konkrete?”
“A do të dëshiroje që sot të kujdesem unë për fëmijët?”
“A do doje të bënim një pushim të shkurtër, vetëm për ne të dy?”
Dashuria nuk shprehet gjithmonë me fjalë të mëdha, por me gjeste të vogla kujdesi.
Është normale të ndjejmë shqetësim kur partneri përballet me stres, ndonjëherë reagojmë me nervozizëm, xhelozi apo frikë. Këto reagime e përkeqësojnë situatën.
Pranimi, fleksibiliteti dhe komunikimi i qetë janë çelësat për të ruajtur marrëdhënien të fortë edhe në periudha të vështira. /nzoom.biz/
