Besimi nuk prishet vetëm nga tradhtia apo një gënjeshtër e madhe. Ai mund të zhduket pas premtimeve të pambajtura, të vërtetave të fshehura dhe momenteve kur kuptojmë se nuk mund të mbështetemi më te dikush.
Por a mund të rikthehet besimi?
Mund të falim dikë, të vazhdojmë marrëdhënien dhe të dëshirojmë të besojmë sërish. Besimi nuk rikthehet me vendim – ai fitohet përmes sjelljes dhe kohës.
Pse është kaq e vështirë të rikthehet besimi?
Kur dikush na gënjen, s’vihet në dyshim vetëm veprimi i tij, por edhe imazhi që kishim për të. Mund të fillojmë të pyesim veten nëse ka pasur edhe gënjeshtra të tjera dhe nëse ajo që ndodhi mund të përsëritet.
Për këtë arsye, humbja e besimit shpesh prek edhe besimin që kemi te vetja dhe gjykimi ynë.
Falja është fillimi, jo prova e ndryshimit
Një kërkimfalje e sinqertë është e rëndësishme, por fjalët s’mjaftojnë. Personi duhet të pranojë përgjegjësinë, të mos minimizojë dëmin dhe të tregojë me sjellje se është duke ndryshuar.
“Më fal” nuk ka shumë vlerë nëse pas saj gjithçka vazhdon njësoj.
Mund të falim dhe të mos besojmë më
Falja dhe besimi nuk janë e njëjta gjë. Mund ta falim dikë pa e rikthyer në të njëjtin vend në jetën tonë.
Mund të falim dhe të largohemi, ose të qëndrojmë duke kuptuar se besimi kërkon kohë për t’u rindërtuar. Askush nuk është i detyruar të japë të njëjtin besim vetëm sepse tjetri ka kërkuar falje.
Kur marrëdhënia ka ende një shans?
Një marrëdhënie rindërtohet kur personi që ka cenuar besimin e pranon dëmin, e dëshmon ndryshimin përmes sjelljes së qëndrueshme, por nëse kërkon falje pa ndryshuar asgjë, largimi është jetë zgjedhja më e shëndetshme.
Në rast të kërcënimeve, kontrollit apo dhunës, prioritet duhet të jetë siguria dhe kërkimi i mbështetjes, jo rikthimi i besimit.
Besimi ndërtohet sërish, nuk kthehet thjesht si më parë
Edhe kur marrëdhënia vazhdon, besimi mund të mos jetë i njëjtë. Ai mund të rindërtohet kur fjalët dhe veprimet përputhen.
Pyetja s’është vetëm: “A e dua ende këtë person?”, por edhe: “A ndihem përsëri i sigurt pranë tij? A shoh ndryshim të vërtetë apo vetëm premtime të reja?”
Dashuria mund të jetë arsye për të provuar përsëri, por pa sinqeritet dhe përgjegjësi, ajo s’mjafton për një marrëdhënie të shëndetshme. /nzoom.biz/