Fshesa me korrent duket sikur mund të përthithë çdo papastërti, por ka disa gjëra që duhen pastruar me mjete të tjera.
Përdorimi i saj në situata të papërshtatshme mund të bllokojë filtrat, të ngatërrojë furçën rrotulluese ose të dëmtojë motorin, shkruan nzoom.biz.
Para se ta përdorni, kontrolloni udhëzimet e prodhuesit, jo të gjitha modelet janë të përshtatshme për të njëjtat lloje papastërtish.
Sipas ekspertit Noah Pinsonnault, këto janë pesë gjërat që nuk duhet t’i fusni në një fshesë të zakonshme me korrent.
1. HIRI I OXHAKUT
Mund të duket praktike të pastroni hirin e oxhakut me fshesën e zakonshme, por grimcat e tij mund të bllokojnë shpejt filtrat. Nëse keni shpesh nevojë të pastroni hirin, përdorni një pajisje të posaçme, të projektuar për këtë qëllim.
2. PLUHURAT SHUMË TË IMËTA
Pluhuri i krijuar nga punimet me gips, mielli i derdhur apo toneri i printerit përbëhen nga grimca shumë të vogla. Në sasi të mëdha, ato mund të bllokojnë filtrat dhe të dëmtojnë motorin, pasi fshesat e zakonshme nuk janë projektuar për t’i përthithur.
3. LËNGJET
Pijet e derdhura dhe papastërtitë e lagështa nuk duhen pastruar me një fshesë të zakonshme, përveç rasteve kur pajisja është projektuar posaçërisht për këtë funksion. Për lëngjet nevojiten fshesa që pastrojnë si papastërtitë e thata, ashtu edhe ato të lagështa.
4. COPËZAT E XHAMIT
Edhe pse mund të duket më e lehtë t’i thithni me fshesë sesa t’i mblidhni me dorë, copëzat e xhamit mund të dëmtojnë zorrën dhe pjesë të tjera të pajisjes. Më parë mblidhni me kujdes copat e mëdha, duke përdorur mbrojtje për duart. Fshesën mund ta përdorni për copëzat e vogla vetëm nëse këtë e lejon prodhuesi.
5. OBJEKTET E VOGLA
Monedhat, lidhëset e flokëve dhe kabllot e lëna në dysheme mund të shkaktojnë probleme. Objektet e forta mund të ngecin brenda pajisjes ose të dëmtojnë furçën rrotulluese, ndërsa lidhëset dhe kabllot mund të ngatërrohen rreth saj.
Para se të ndizni fshesën, bëni një kontroll të shpejtë të dyshemesë dhe largoni objektet që bllokojnë pajisjen. /nzoom.biz/