Kur flitet për kënaqësinë seksuale, fokusi shpesh shkon te aspekti fizik.
Një studim i ri nga universitete në Spanjë sugjeron se ajo që ka ndikimin më të madh s’është aq mekanike sa duket, shkruan nzoom.biz.
Studiues nga Universiteti Loyola Andalucía dhe ai i Granadës analizuan 518 gra të shëndetshme, të moshave nga 18 deri në 62 vjeç, të cilat kishin përjetuar orgazmë në marrëdhënie me një partner.
Qëllimi nuk ishte të studionin problemet, por të kuptonin çfarë funksionon kur gjithçka shkon mirë.
Rezultati është i qartë: faktori më i rëndësishëm është ai emocional.
Studimi, i publikuar në revistën Sexuality & Culture, tregoi se dimensioni afektiv – pra ngarkesa emocionale që një grua i atribuon momentit të orgazmës – është elementi më i fortë që lidhet me funksionimin e përgjithshëm seksual.
Me fjalë të tjera: mënyra si ndihesh, ka më shumë peshë sesa ajo që ndodh fizikisht.
Pjesëmarrëset u vlerësuan sipas elementeve: ndjesitë fizike, ndjenja e afërsisë, përjetimi emocional e ndjesia e “shpërblimit”.
Shumica e këtyre faktorëve kishin lidhje pozitive me kënaqësinë seksuale, por vetëm ai emocional rezultoi thelbësor statistikisht.
Një tjetër faktor që ndikonte ishte të qenit në një marrëdhënie të qëndrueshme. Gratë që kishin partner të rregullt raportuan nivele më të larta të kënaqësisë, afërsisë dhe përjetimit emocional.
Megjithatë, studiuesit theksojnë diçka interesante: rëndësia e faktorit emocional mbetet e njëjtë, pavarësisht nëse je në një lidhje të qëndrueshme apo jo.
Çfarë do të thotë kjo?
Autorët e studimit sugjerojnë që çdo përpjekje për të përmirësuar jetën seksuale të grave nuk duhet të përqendrohet vetëm te aspekti fizik, por edhe te ai emocional: komunikimi në çift, lidhja emocionale gjatë intimitetit dhe edukimi seksual që nuk e redukton kënaqësinë në teknikë.
Studimi vë në dukje një problem më të gjerë: shumica e kërkimeve janë përqendruar te çfarë nuk ka funksionuar, ndërsa përvoja e grave të shëndetshme ka mbetur më pak e studiuar.
Edhe pse ka kufizimet e veta (mostër më e re në moshë dhe me nivel të lartë arsimor, si dhe përdorimi i pyetësorëve online), studimi hap një perspektivë të qartë.mMesazhi është më i thjeshtë nga sa duket: kënaqësia nuk është vetëm fizike.
Pra, çfarë bën diferencën më të madhe është mënyra si ndihesh, jo vetëm ajo që ndodh. /nzoom.biz/